Қирғизистон расмийларига хорижий ҳисоб рақами очиш тақиқланди

Қирғизистон президенти Садир Жапаров томонидан имзоланган янги Коррупцияга қарши кураш тўғрисидаги қонун давлат амалдорларига бир қатор чекловлар жорий этади. Бу ҳақда 24.kg нашри хабар берди.

 

Унга кўра, расмий шахсларга хорижий банкларда ҳисоб очиш, қариндошларининг бизнесига ёрдам бериш, филиал компаниялар билан битимларда иштирок этиш, шахсий манфаатлар учун расмий ресурслардан фойдаланиш, совғалар ва мукофотлар олиш тақиқланган. Расмий эсдалик совғалари бундан мустасно.

 

Давлат идораларига коррупция ҳақида маълумот олиш учун хавфсиз каналлар яратиши ва бундай ҳуқуқбузарликлар ҳақида хабар берган шахсларни ҳимоя қилиши мажбурий этиб белгиланган.

 

Ҳужжатда коррупцияга қарши сиёсат тизимли тарзда тартибга солиниб, жиноятларни олдини олишдан тортиб, уларни аниқлаш, жавобгарликка тортиш ва оқибатларини бартараф этиш механизмлари мустаҳкамланган. Молиявий назорат талабларига кўра, мансабдор шахслар ўз даромадлари, харажатлари ва мол-мулкини, жумладан хорижий активларни декларация қилиши шарт, солиқ органлари эса уларнинг мувофиқлигини таҳлил қилади.

 

Шунингдек, коррупция хавфларини таҳлил қилиш, норматив-ҳуқуқий ҳужжатларни баҳолаш, жиноятларни ягона реестрда қайд этиш ва жиноий йўл билан қўлга киритилган активларни қайтариш бўйича халқаро ҳамкорлик механизмлари жорий этилган. Қонун кучга кириши билан Қирғизистон ҳукуматига олти ой ичида ўз қоидаларини янги қонунга мувофиқлаштириш вазифаси юклатилган.