Наманганда болаларни олиб кетаётган машина ЙТҲга учраши оқибатида бир бола ҳалок бўлди
Ҳодиса кундузги парвариш маркази тарбияланувчиларини марказга олиб кетаётган транспорт воситасида 6 нафар бола бўлган вақтда юз берган.
Жорий йилнинг 18 февраль куни соат тахминан 08:30 ларда Норин туманида жойлашган “Умид чироғи” кундузги парвариш хизмати тарбияланувчиларини марказга олиб кетиш жараёнида йўл-транспорт ҳодисаси содир бўлди. Бу ҳақда Ижтимоий ҳимоя агентлиги матбуот хизмати хабар берди.
Дастлабки маълумотларга кўра, ҳодиса вақтида транспорт воситасида 6 нафар тарбияланувчи бўлган. Йўл-транспорт ҳодисаси оқибатида тарбияланувчилардан бири — 2015 йилда туғилган Sh.X. оғир тан жароҳатлари сабаб вафот этган.
Қолган 5 нафар болага Норин туман тиббиёт бирлашмасида зарур биринчи тиббий ёрдам кўрсатилган. Ҳозирги вақтда уларнинг умумий аҳволи шифокорлар томонидан қониқарли деб баҳоланмоқда.
Мазкур ҳолат юзасидан тегишли ҳуқуқни муҳофаза қилувчи органлар томонидан белгиланган тартибда текширув ишлари олиб борилмоқда.
