Наркотик моддалар контрабандаси билан шуғулланган шахслар 15 йилга қамалди

 

 

Гиёҳвандлик воситалари контрабандаси ва ноқонуний савдосига қарши курашиш доирасида 2025 йил август ойида Давлат хавфсизлик хизмати Чегара қўшинлари ҳамда Сурхондарё вилояти бўйича бошқармаси, шунингдек вилоят Ички ишлар бошқармаси ходимлари ҳамкорлигида Узун туманида тезкор тадбир ўтказилди. Бу ҳақда ДХХ Zamon.uz'га хабар берди.

 

Тадбир давомида 2005 ва 2006 йилларда туғилган икки нафар маҳаллий фуқаро давлат чегарасини ноқонуний равишда кесиб ўтиб, Тожикистон Республикасидан 20 кг 374 гр «опий» ҳамда 41 кг 668 гр «гашиш» моддаларини олиб келаётган вақтида ашёвий далиллар билан ушланган.

 

Тезкор тадбирлар изчил давом эттирилиб, мазкур шахсларнинг жиноий шериклари – Узун туманида яшовчи 2000 ва 2004 йилларда туғилган икки нафар фуқаро ҳамда ушбу жиноятнинг буюртмачиси ҳисобланган, Денов шаҳрида истиқомат қилувчи 2000 йилда туғилган шахс ҳам процессуал тартибда қўлга олинган.

 

Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда. Жиноят ишлари бўйича Узун туман судининг ҳукмига кўра, қонунбузарлар Ўзбекистон Республикаси Жиноят кодексининг 223, 246 ва 273-моддалари билан айбли деб топилди.

 

Суд ҳукмига мувофиқ, уларнинг ҳар бирига нисбатан 15 йил муддатга озодликдан маҳрум қилиш жазоси тайинланди.