Сурхондарёда ҳоким ўринбосари, Наманганда ҳоким ёрдамчиси пора билан ушланди

 

Ҳуқуқни муҳофаза қилувчи органлар томонидан ўтказилган тезкор тадбирлар давомида Сурхондарё ва Наманган вилоятларида мансабдор шахсларнинг коррупцион ҳолатларга алоқадор ноқонуний ҳаракатлари аниқланиб, уларга нисбатан қонуний чоралар кўрилди. Бу ҳақда ДХХ Zamon.uz' га хабар берди.

 

Аниқланишича, Сурхондарё вилояти Жарқўрғон тумани ҳокими ўринбосари ўз хизмат мавқеидан фойдаланган ҳолда ҳокимлик захирасидаги 9 гектар ер майдонини Шеробод туманида яшовчи фуқарога полиз экинлари етиштириш учун 4 ой муддатга ижарага бериш эвазига 90 миллион сўм талаб қилган. У жорий йил январь ойида ушбу маблағнинг 30 миллион сўмини олган.

 

Давлат хавфсизлик хизмати ҳамда Бош прокуратура ҳузуридаги Департамент ходимлари ҳамкорлигида ўтказилган тезкор тадбирда мансабдор шахс қолган 60 миллион сўмни Термиз шаҳридаги умумий овқатланиш шахобчаларидан бирида олаётган вақтида ашёвий далиллар билан ушланган.

 

Мазкур ҳолат юзасидан унга нисбатан Жиноят кодексининг 210-моддаси 1-қисми билан жиноят иши қўзғатилиб, «қамоқ» эҳтиёт чораси қўлланган. Ҳозирда тергов ҳаракатлари давом этмоқда.

 

Шунингдек, Наманган вилояти Чуст туманида ҳам мансабдор шахснинг ноқонуний ҳаракатларига чек қўйилди. Туман ҳокимининг маҳалла фуқаролар йиғинларидан биридаги ёрдамчиси 2022 йилда «Садақа» кичик саноат зонаси ҳудудидан қариндошига ажратилган 43 сотих ер майдонининг 20 сотих қисмини ҳокимиятдаги танишлари орқали бошқа фуқаро номига расмийлаштириб бериш эвазига 23 минг АҚШ доллари талаб қилган.

 

У олдиндан 10 минг АҚШ долларини олаётган вақтида Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан қўлга олинган.

 

Ҳолат юзасидан унга нисбатан Жиноят кодексининг 25, 168-моддаси 4-қисми «а» банди билан жиноят иши қўзғатилиб, ҳозирда тергов ҳаракатлари олиб борилмоқда.