Навоийда ноқонуний сақланаётган 1100 дона патрон мусодара қилинди
Мазкур ҳолат бўйича жиноят иши қўзғатилган ва шахсга “қамоқ” эҳтиёт чораси қўлланилган.
Навоий вилояти, Конимех туманида Давлат хавфсизлик хизмати бошқармаси ва Ички ишлар органлари ходимлари ҳамкорлигида ўтказилган тезкор тадбир давомида Бухоро вилояти, Ғиждувон туманида яшовчи, 1989 йилда туғилган шахсга тегишли «Оnix» русумли автомобиль кўздан кечирилган. Бу ҳақда ДХХ Zamon.uz'га хабар берди.
Текширув натижасида автомашина юкхонасида 500 дона 5,6 мм калибрли отиш учун яроқли патронлар топилган ва тегишли тартибда расмийлаштирилган. Шунингдек, тадбир давомида шахснинг яшаш хонадонидан 600 дона 5,6 мм калибрли патронлар топилган. Шу тариқа, жами 1100 дона патрон ноқонуний сақланаётганлиги аниқланган.
Мазкур ҳолат бўйича Жиноят кодексининг 248-моддаси 3-қисми (ўқотар қурол, ўқ-дорилар, портловчи моддалар ва қурилмаларнинг қонунга хилоф муомаласи) бўйича жиноят иши қўзғатилган ва шахсга «қамоқ» эҳтиёт чораси қўлланилган. Ҳозирда тергов ҳаракатлари давом этмоқда, барча далиллар расмий тартибда йиғилмоқда ва тергов жараёнида қонуний чоралар кўрилмоқда.
