Ғаллаорол ҳокимлиги қишлоқ хўжалиги бўлими бош мутахассиси 6700 доллар олганида ушланди
У фермер хўжалигига тегишли 11 гектар ер майдонини сотиш ва ҳужжатларни расмийлаштириб бериш эвазига пул талаб қилган.
Жиззах вилояти Ғаллаорол туманида ер майдонини ноқонуний сотиш билан боғлиқ коррупцион ҳолат аниқланди. Бу ҳақда ДХХ Zamon.uz'гa хабар берди.
Маълум қилинишича, туман ҳокимлигининг қишлоқ хўжалиги бўлими бош мутахассиси ўзининг ўғлига тегишли фермер хўжалигининг 11 гектар ер майдонини харидорга 11 минг АҚШ долларига сотишга келишган. У келишув доирасида олдиндан 5 минг АҚШ доллар олган.
Шунингдек, у ерга оид тегишли ҳужжатларни ҳокимлик ҳамда кадастр идораларидаги танишлари орқали расмийлаштириб бериш эвазига қолган 6 минг АҚШ доллари ва қўшимча 700 АҚШ доллари, жами 6700 АҚШ долларини олаётган вақтида қўлга олинган.
Тезкор тадбир Давлат хавфсизлик хизмати ҳамда Иқтисодий жиноятларга қарши курашиш департаменти ходимлари ҳамкорлигида ўтказилган.
Мазкур ҳолат юзасидан бош мутахассисга нисбатан Жиноят кодексининг 168-моддаси 3-қисми «а» банди ҳамда 28, 211-моддаси 1-қисми билан жиноят иши қўзғатилган.
Ҳозирда ушбу жиноят иши доирасида тергов ҳаракатлари олиб борилмоқда.
