Садир Жапаров бош вазир ўринбосари ва соғлиқни сақлаш вазирини лавозимидан озод қилди
Қирғизистон ҳукуматида яна кадрлар ўзгариши амалга оширилди.
Қирғизистон президенти Садир Жапаров ҳукумат таркибида кадрлар ўзгариши юзасидан қарор қабул қилди. Унга кўра, Вазирлар Маҳкамаси раиси ўринбосари ҳамда Сув хўжалиги, қишлоқ хўжалиги ва қайта ишлаш саноати вазири Бақит Торобаев лавозимидан озод этилди.
Бу ҳақда Қирғизистон президенти матбуот хизмати хабар берди.
Шунингдек, Қирғизистон соғлиқни сақлаш вазири Канибек Досмамбетов ҳам эгаллаб турган лавозимидан озод қилинди.
Аввалроқ давлат раҳбари томонидан ҳукуматнинг яна бир қатор аъзолари лавозимидан бўшатилгани маълум қилинган эди. Хусусан: Фавқулодда вазиятлар вазири Бообек Ажикеев, Транспорт ва коммуникациялар вазири Абсаттар Сирғабоев, Табиий ресурслар, экология ва техник назорат вазири Медер Машиев лавозимидан озод этилган.
Бундан ташқари, жорий йил 10 февраль куни Миллий хавфсизлик давлат қўмитаси раиси Камчибек Ташиев ҳам лавозимидан бўшатилгани ҳақида хабар берилган эди.
