Telegram'да болалар порнографиясини тарқатган шахслар ушланди
Гумонланувчилар ноқонуний материалларни ижтимоий тармоқлар орқали сотиб, катта миқдорда даромад олгани аниқланган.
Ҳуқуқни муҳофаза қилувчи органлар томонидан ўтказилган тезкор тадбирлар давомида Telegram мессенжери орқали вояга етмаганлар иштирокидаги тақиқланган порнографик материалларни тарқатган фуқаролар аниқланди. Бу ҳақда ИИВ Киберхавфсизлик маркази марбуот хизмати хабар берди.
Жумладан, Жиззах вилояти Ички ишлар бошқармаси ходимлари томонидан ўтказилган тезкор тадбирда мессенжерда вояга етмаганлар иштирокидаги ахлоқсиз ва порнографик мазмундаги материалларни тарқатиб келган шахс аниқланган. Маълум бўлишича, у 442 нафар обуначига эга бўлган канал орқали жами 403 турдаги болалар порнографик материалларини тарқатган.
Дастлабки суриштирув жараёнида гумонланувчи қизиқиш юзасидан шунга ўхшаш каналларга қўшилганидан сўнг ўзи ҳам катталар ва вояга етмаганлар иштирокидаги ноқонуний видеолар жойлаштирилган канал ташкил этганини маълум қилган ҳамда қилган ишидан пушаймон эканини билдирган.
Шунингдек, Тошкент вилоятида яшовчи 21 ёшли фуқаро ҳам Telegram мессенжерда қизлар номидан 6 та канал очиб, уларга жами 3 750 та порнографик материал жойлаштиргани аниқланган. Терговга қадар текширувларда унинг бошқа ижтимоий тармоқлар орқали 837 нафар шахсга вояга етмаганлар иштирокидаги порнографик маҳсулотларни сотгани ва 29,2 миллион сўм миқдорида ноқонуний даромад олгани аниқланган.
Мазкур ҳолатлар юзасидан Жиноят кодексининг 130-моддаси 3-қисми билан жиноят ишлари қўзғатилди.
Ҳозирда гумонланувчиларга нисбатан қамоққа олиш тарзидаги эҳтиёт чораси қўлланилган бўлиб, тергов ҳаракатлари давом эттирилмоқда.
