Тошкент вилоятида ҳоким ёрдамчиси 10 минг доллар билан ушланди
У давлат захирасидаги 4 сотих ерни ҳокимликдаги танишлари ёрдамида сохта маълумотлар асосида харидор номига расмийлаштириш эвазига 50 минг АҚШ доллари талаб қилган.
Тошкент вилояти Қибрай туманида ҳокимнинг тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича МФЙдаги ёрдамчисининг коррупцион ҳаракати фош этилди. Бу ҳақда ДХХ Zamon.uz'га хабар берди.
У МФЙ биноси ёнида жойлашган, давлат захирасидаги 4 сотих ерни ҳокимликдаги танишлари ёрдамида архив ҳужжатларига сохта маълумотлар киритиб, харидор номига расмийлаштириш эвазига 50 минг АҚШ доллари талаб қилган.
Давлат хавфсизлик хизматининг Тошкент вилояти бошқармаси ва Иқтисодий жиноятларга қарши курашиш департаменти ходимлари томонидан ўтказилган тезкор тадбирда, у талаб қилинган сумманинг 10 минг долларини олган вақтида ушланди ва ашё далиллар билан қўлга олинди.
Ҳозирда ҳоким ёрдамчиси Жиноят кодексининг 168-моддаси 4-қисми «а» банди ва 28,211-моддаси 3-қисми «а» банди билан жиноят иши қўзғатилган, тергов ҳаракатлари давом этмоқда.
