Жиззахда Cobalt ҳайдовчилари Hyundai автомобилини тўхтатиб, ичидаги тадбиркорларни калтаклади
Ҳодиса оқибатида уч киши тан жароҳати олган, шунингдек, автомашинага ҳам зарар етказилган.
Жорий йилнинг 14 февраль куни Жиззах вилояти Дўстлик туманида фуқароларга нисбатан зўравонлик билан боғлиқ ҳолат юз берди. Бу ҳақда вилоят Ички ишлар бошқармаси ахборот хизмати маълум қилди.
Дастлабки маълумотларга кўра, иккита Cobalt русумли автомашина Hyundai русумли автомобилни йўл четига қисиб тўхтатган ва бир гуруҳ нотаниш шахслар машинага келиб, ҳайдовчи ҳамда йўловчиларга нисбатан жисмоний зўравонлик ишлатган.
Оқибатда Қарши шаҳри ҳамда Қарши туманида яшовчи, 1982, 1987 ва 1989 йилларда туғилган тадбиркорларга турли даражадаги тан жароҳатлари етказилиб, автомашинанинг ўнг томондаги кўрсаткичи ва олд ён ойнаси синдирилган.
Олиб борилган тезкор-қидирув тадбирлари натижасида мазкур жиноятни содир этишда гумон қилинаётган шахслар аниқланган. Улар орасида Тошкент шаҳрининг Сергели, Чилонзор ва Учтепа туманларида, шунингдек, Тошкент вилоятининг Зангиота туманида истиқомат қилувчи, 1990–2004 йилларда туғилган жами 7 нафар фуқаро борлиги маълум қилинган.
Мазкур ҳолат юзасидан Жиноят кодексининг 277-моддаси учинчи қисми «г» банди билан жиноят иши қўзғатилган. Ҳозирда гумонланувчилардан уч нафарига нисбатан қамоқ эҳтиёт чораси қўлланилган.
