"Euronews" раҳбари Экология ва иқлим ўзгариши миллий қўмитаси фаолияти билан танишди
Экология қўмитаси раиси Азиз Абдуҳакимов "Euronews" раҳбари Педро Варгас Давидга экологик ташаббусларни ёритиш ва халқаро ҳамкорликни ривожлантиришга қўшган ҳиссаси учун “Табиат ҳимоячиси” кўкрак нишонини топширди.
Euronews раҳбари Педро Варгас Давид Ўзбекистон Экология ва иқлим ўзгариши миллий қўмитаси фаолияти билан танишди. Бу ҳақда Экология ва иқлим ўзгариши миллий қўмитаси матбуот хизмати хабар берди.
Учрашув давомида томонлар ахборот ҳамкорлигини кенгайтириш, Ўзбекистоннинг экологик кун тартибини халқаро майдонда фаол тарғиб этиш, шунингдек, атроф-муҳитни муҳофаза қилиш ва иқлим ўзгаришига қарши кураш борасидаги ташаббусларни кенг ёритишга қаратилган қўшма медиа-лойиҳаларни амалга ошириш истиқболларини муҳокама қилдилар.
Шунингдек, глобал иқлим кун тартиби доирасида Ўзбекистон ташаббусларига халқаро ҳамжамият эътиборини жалб қилиш, экологик маданиятни ошириш ва «яшил» ривожланиш ғояларини оммалаштириш масалаларига алоҳида эътибор қаратилди.
Учрашув якунида Экология қўмитаси раиси Азиз Абдуҳакимов Педро Варгас Давидга экологик ташаббусларни ёритиш ҳамда халқаро ҳамкорликни ривожлантиришга қўшган ҳиссаси учун “Табиат ҳимоячиси” кўкрак нишонини тантанали равишда топширди.
Ташриф доирасида хорижий делегация учун Экология ва иқлим ўзгариши миллий қўмитаси тизими бўйлаб таништирув экскурцияси ҳам ташкил этилди. Меҳмонлар экологик ҳолат мониторинги, тезкор вазиятларни таҳлил қилиш ва мувофиқлаштириш ишлари олиб бориладиган Ситуацион марказ фаолияти, шунингдек, тизим ташкилотларининг асосий йўналишлари билан яқиндан танишди.
