Тошкент вилоятида гиёҳванд моддалар савдоси билан шуғулланган жиноий гуруҳлар фош этилди

 

Тошкент вилояти Ички ишлар бош бошқармаси ҳамда Давлат хавфсизлик хизмати томонидан Зангиота туманини пойтахт ҳудудлари мисолида хавфсиз ва жиноятчиликдан холи ҳудудга айлантириш, шунингдек гиёҳвандлик воситалари ва психотроп моддаларнинг ноқонуний айланишига қарши курашиш мақсадида қатор тезкор тадбирлар ўтказилди.

 

Ўтказилган тезкор тадбирлар давомида, хусусан, Яккасарой туманида яшовчи 22 ёшли фуқаро 26 дона кучли таъсир қилувчи гиёҳванд моддаларни тахминий харидорга 2 миллион сўмга сотаётган вақтида фош этилди. Тошкент вилояти Ички ишлар бош бошқармаси матбуот хизмати хабар берди.

 

Шунингдек, Сергели, Қуйичирчиқ, Қибрай ҳамда Мирзо Улуғбек туманларида тезкор тадбирлар изчил давом эттирилиб, 26 ёшдан 50 ёшгача бўлган уч нафар эркак ва икки нафар аёл юқоридаги шахсга дори-дармон воситаларини етказиб бераётган вақтида қўлга олинган.

 

Тезкор ҳаракатлар натижасида тўрт кун ичида жами олти кишидан иборат гиёҳванд моддалар савдоси занжири фош этилди. Улардан турли ўлчам ва турдаги 98 дона кучли таъсир қилувчи гиёҳванд моддалар ҳамда 135 грамм гашиш мусодара қилиниб, процессуал тартибда расмийлаштирилди.

 

Бундан ташқари, Зангиота туманида аниқланган яна бир ҳолатда, 1993 йилда туғилган, Қўқон шаҳрида яшовчи фуқаро 1181 дона психотроп препаратни тахминий харидорга 30 миллион сўмга сотишга уринган вақтида ашёвий далиллар билан қўлга олинган.

 

Маълум қилинишича, сўнгги 40 кун давомида Зангиота туманида гиёҳванд моддалар ва психотроп воситалар билан боғлиқ жами 16 та жиноят ҳолати аниқланиб, иккита уюшган жиноий гуруҳ фаолиятига тўлиқ чек қўйилган.

 

Кўрилган тезкор чоралар натижасида ноқонуний муомаладан 1 килограмм турли хил гиёҳванд моддалар, 1371 дона кучли таъсир қилувчи гиёҳванд воситалар ҳамда 2000 дозага тенг 400 грамм синтетик гиёҳванд моддалар мусодара қилинди.

 

Мазкур йўналишда тезкор-қидирув ва профилактик тадбирлар изчил равишда давом эттирилмоқда.