Тошкент вилоятидаги боғчаларда болалар заҳарланиши бўйича 10 киши қамоққа олинди
1 кишига уй қамоғи тарзидаги эҳтиёт чораси қўлланилган.
2025 йил 24 сентябрь куни Тошкент вилоятининг Пискент, Бўка, Бекобод, Қуйичирчиқ ва Оққўрғон туманларида мактабгача таълим муассасалари тарбияланувчиларининг заҳарланиш ҳолатлари аниқланган эди. Ушбу ҳолат юзасидан Тошкент вилояти Ички ишлар бош бошқармаси ҳузуридаги тергов бошқармаси томонидан бир нечта аутсорсинг хизматини кўрсатувчи хусусий корхоналар масъул шахсларига нисбатан жиноят иши қўзғатилган эди. Бу ҳақда Олий суд матбуот хизмати хабар берди.
Жиноят ишлари бўйича Бўка туман судига келиб тушган ишда 11 шахс айбланмоқда:
“Shark Milk Product” МЧЖ директори ва раҳбарлари (Р.О., С.С., Ф.О., А.С., Р.Х., М.Н., Д.Қ.); “Governess Business” МЧЖ директори (Ж.Х.); “Kinder Garden Group”МЧЖ директори (Ф. Д.); “Innavation Outsourcing Servise” МЧЖ директори (И.С.); “Nishon Invest” МЧЖ директори (Б.Р.).
Айбланувчилар Жиноят кодексининг 186-моддаси 4-қисми «б» банди (хавфсизлик талабларига жавоб бермайдиган товарларни ишлаб чиқариш, сақлаш ёки хизмат кўрсатиш) ва 257-1-моддаси 1-қисми (санитарияга оид қонунчиликни ёки эпидемияга қарши кураш қоидаларини бузиш) билан айбланмоқда.
Ҳозирги пайтда 10 шахсга қамоққа олиш, 1 шахсга уй қамоғи тарзидаги эҳтиёт чораси қўлланилган. Жиноят ишини кўришни тайинлаш масаласи ҳозирда ўрганилмоқда.
