Сурхондарёда Президент билан учрашган ўқувчига университет гранти ажратилди

 

Сурхондарёга ташрифи давомида Президент Шавкат Мирзиёев Жарқўрғон туманидаги “Янги Ўзбекистон” массивида жойлашган 66-сонли умумий ўрта таълим мактабида бўлди. Ташриф доирасида давлат раҳбари педагоглар ҳамда ўқувчи-ёшлар билан мулоқот ўтказиб, таълим сифати, яратилаётган шароитлар ва ёшларнинг келажак режалари билан қизиқди. Бу ҳақда Олий таълим, фан ва инновациялар вазирлиги хабар берди.

 

Учрашув давомида Президент иқтидорли ўқувчи Феруза Жумагулова билан суҳбатлашди. Суҳбат чоғида ўқувчи келгусида Термиз давлат университетида таҳсил олиш орзусини билдирган. Давлат раҳбари ташаббуси билан Феруза Жумагулова 2027–2028-ўқув йилидан бошлаб грант асосида мазкур олий таълим муассасасига қабул қилиниши белгиланди.

 

Мазкур қарор ёшларни қўллаб-қувватлаш, уларнинг интеллектуал салоҳиятини рўёбга чиқариш ҳамда сифатли таълим олишлари учун кенг имкониятлар яратиш борасидаги изчил сиёсатнинг амалий ифодасидир.

 

Тадбирда Президент Администрацияси раҳбари ўринбосари Илҳом Сирожев, Олий таълим, фан ва инновациялар вазири Қўнғиротбой Шарипов, Мактабгача ва мактаб таълими вазири Эъзозхон Каримова, Термиз давлат университети ректори Абдуқодир Тошқулов ҳамда вилоят мутасаддилари, мактаб жамоаси ва ўқувчининг оила аъзолари иштирок этди.

 

Тадбир якунида Феруза Жумагуловага грант асосида ўқишга қабул қилиниши тўғрисидаги сертификат тантанали равишда топширилди ҳамда унга келгусидаги таълим йўлида муваффақиятлар тиланди.

 

Аввалроқ, Тошкент шаҳрида ёшлар билан учрашув чоғида ҳам Президент Шавкат Мирзиёев томонидан иқтидорли ўқувчиларга эътибор ва рағбат намуналари кўрсатилгани кузатилган эди.

 

Аввалроқ Шавкат Мирзиёевнинг Тошкентдаги ёшлар билан учрашувида қўшиқ куйлаган хоразмлик ўқувчига машина совға қилган эди.