Измирда ўзбекистонлик аёл тўртинчи қаватдан тушиб кетди
У турк фуқаросига турмушга чиққан бўлиб, ҳодиса куёвнинг уйида содир бўлган.
Туркиянинг Измир шаҳрида ўзбекистонлик аёл кўп қаватли уйнинг тўртинчи қаватидан тушиб кетди. Бу ҳақда Ўзбекистоннинг Истанбул шаҳридаги Бош консулхонаси маълум қилди.
Дастлабки маълумотларга кўра, Наманган вилоятидан бўлган 22 ёшли фуқаро Севдора Ҳакимжонова Измирда яшаб келаётган вақтида ҳодисага учраган. У ҳозирда давлат шифохонасида даволанмоқда, шифокорлар унинг аҳволини оғир деб баҳоламоқда.
Маълумотларга кўра, аёл Туркия фуқароси билан имом никоҳи асосида турмуш қурган, бироқ ушбу никоҳ расмий равишда рўйхатдан ўтказилмаган. Никоҳ маросими Чуст туманида ўтказилган. Кейинчалик эр-хотин Измирга кўчиб ўтиб, куёвнинг қариндошлари билан бирга яшаб келган.
Қайд этилишича, турмуш ўртоғи ҳам марҳума каби эшитиш ва нутқида нуқсони бўлган шахс ҳисобланади.
Мазкур ҳодиса юзасидан Туркия ҳуқуқни муҳофаза қилувчи органлари томонидан жиноят иши қўзғатилиб, воқеа тафсилотларини аниқлаш бўйича тергов ҳаракатлари олиб борилмоқда. Тўпланган материаллар прокуратура томонидан кўриб чиқилади.
Бош консулхона вазият назоратга олинганини билдириб, жабрланувчининг соғлиғи ҳамда тергов жараёнлари юзасидан Туркия ваколатли идоралари билан ҳамкорлик давом этаётганини маълум қилди.
