Бухорода Кўкдала тажрибаси асосида янги бошқарув маркази шакллантирилмоқда

 

Президент Шавкат Мирзиёев Бухоро шаҳрига ташрифи доирасида вилоятнинг янги маъмурий марказида амалга оширилаётган бунёдкорлик ишлари билан танишди.

 

Мазкур мажмуа давлат бошқарувини аҳолига янада яқинлаштириш, хизматлар сифатини ошириш ҳамда фуқаролар учун қулай муҳит яратишга қаратилган янги ёндашувнинг амалий ифодасидир. Ушбу тизим аввал Қашқадарё вилоятининг Кўкдала туманида синовдан муваффақиятли ўтган тажриба асосида шакллантирилмоқда.

 

У ерда 38 та давлат идорасининг бир ҳудудда жамланиши фуқаролар учун катта қулайлик яратиб, ортиқча вақт ва масофа сарфини камайтирган эди. Эндиликда ушбу ёндашув бошқа ҳудудларда ҳам кенг жорий этилмоқда.

 

Бухородаги янги маъмурий марказ 14 гектар майдонда барпо этилмоқда. Биринчи босқичда вилоят ва шаҳар ҳокимликлари, прокуратура ҳамда ички ишлар бошқармаси каби асосий идоралар бир жойга жамланган. Бу эса давлат органлари ўртасидаги мувофиқлашувни кучайтириш, мурожаатлар билан ишлаш самарадорлигини ошириш ва хизматлар сифатини яхшилашга хизмат қилади.

 

Мажмуа фақат маъмурий бинолардан иборат эмас — бу ерда фуқаролар учун хиёбонлар, яшил ҳудудлар ва фавворалар ҳам барпо этилиб, аҳолининг дам олиши учун қулай шароит яратилмоқда.

 

Ташриф давомида ҳудудни ижтимоий-иқтисодий ривожлантириш бўйича тақдимот ҳам ўтказилди. Унда банклар томонидан сунъий интеллект асосида ҳудуд ва маҳаллалар кесимида таҳлиллар олиб борилгани, натижада Бухоро туманида агробизнес, туризм, саноат ва сервис соҳалари устувор йўналишлар сифатида белгиланганлиги маълум қилинди.

 

Шунингдек, 15 минг гектар ерни ўзлаштириш, 500 гектар узумзорлар барпо этиш, энотуризмни ривожлантириш ҳамда нефть-газ, кимё ва озиқ-овқат саноатида янги лойиҳаларни амалга ошириш режалаштирилган. Ҳисоб-китобларга кўра, 2026–2031 йилларда ушбу йўналишларда 7,4 триллион сўмлик инвестициялар жалб қилиниб, 15 мингдан ортиқ иш ўринлари яратилиши мумкин.

 

Туман даражасида 36 та маҳалла 6 та асосий драйвер йўналишга ихтисослаштирилиши кўзда тутилган. Лойиҳаларни бошқариш ва мониторинг қилишда сунъий интеллект технологияларидан фойдаланиш, ресурсларни самарали тақсимлаш ва натижадорликни ошириш режалаштирилган.

 

Давлат раҳбари сунъий интеллект асосида ҳудуд салоҳиятини тўлиқ ишга солиш, лойиҳаларни аниқ натижага йўналтириш ва аҳоли даромадини оширишга хизмат қилувчи ташаббусларни қўллаб-қувватлаш зарурлигини таъкидлади.