Ҳормуз бўғозида 3200 кема хавфсиз ўтишни кутмоқда
Муқобил йўналишларга ўтиш логистика харажатлари ва етказиб бериш вақтини оширмоқда.
Халқаро медиа манбаларига кўра, Ҳормуз бўғозида хавфсиз ўтишни кутаётган кемалар сони кескин ошган. Fox News хабар беришича, ҳозирда мазкур ҳудудда қарийб 3200 кема навбатда турибди.
Маълумотларга кўра, уларнинг 800 га яқини танкерлар ва қуруқ юк ташувчи кемалардан иборат. Вазият минтақада денгиз логистикасига сезиларли босимни кучайтирмоқда.
Кpler таҳлилчиси Метт Смит сўнгги кунларда бўғоз орқали нефть маҳсулотлари ҳаракати деярли тўхтаганини таъкидлаган. Унинг сўзларига кўра, “бўғозда нефть оқими кузатилмаяпти, амалда бу йўналиш тўхтаб қолган”.
Халқаро денгиз ташкилоти маълумотларига кўра, мавжуд ҳолат туфайли минтақада тахминан 20 минг денгизчи турли кемаларда қолиб кетган. Айрим кемалар муқобил йўналишлар орқали ҳаракатланаётган бўлсада, бу логистика харажатлари ва етказиб бериш муддатларининг ошишига олиб келмоқда.
Ҳормуз бўғози жаҳон энергия ташувининг муҳим йўлларидан бири бўлиб, глобал нефть савдосининг тахминан 20 фоизи айнан шу ҳудуд орқали амалга оширилади.
