Ўзбекистон ва Қозоғистон Президентлари Бухоронинг тарихий мероси билан танишдилар

 

Ўзбекистон Президенти Шавкат Мирзиёев ва Қозоғистон Президенти Қасим-Жомарт Тоқаев Бухоро шаҳрига ташриф доирасида унинг бой тарихий-маданий мероси билан яқиндан танишдилар.

 

Давлат раҳбарлари қадимий Бухоронинг дунёга машҳур ёдгорликлари – Арк қўрғони, Пои Калон ва Лаби Ҳовуз мажмуаларини зиёрат қилдилар.

 

Ташрифнинг дастлабки манзили бўлган Арк қалъаси асрлар давомида Бухоронинг сиёсий ва маъмурий маркази сифатида хизмат қилган. Мазкур тарихий обида бугунги кунда ЮНEСКОнинг Бутунжаҳон мероси рўйхатига киритилган Бухоро тарихий марказининг муҳим қисми ҳисобланади.

 

Шундан сўнг етакчилар Марказий Осиёнинг энг йирик меъморий мажмуаларидан бири — Пои Калон ансамблига ташриф буюрдилар. 1127 йилда бунёд этилган Калон минораси, Калон масжиди ва Мир Араб мадрасасини ўз ичига олган ушбу мажмуа Бухоронинг тарихий қиёфасини белгиловчи асосий обидалардан биридир.

 

Лаби Ҳовуз мажмуаси ҳам олий мартабали меҳмонларда катта таассурот қолдирди. Кўкалдош ва Нодир Девонбеги мадрасалари ҳамда хонақоҳдан иборат ушбу ҳудуд асрлар давомида илм-фан, маданият ва савдо маркази сифатида машҳур бўлиб келган.

 

Ташриф давомида меҳмонларга Бухоронинг Буюк ипак йўлидаги ўрни, унинг ислом цивилизацияси, илм-фан ва маданият ривожига қўшган ҳиссаси ҳақида батафсил маълумот берилди. Шунингдек, халқ ҳунармандчилиги ва анъанавий безак санъати намуналарининг ўзига хослиги намойиш этилди.

 

Таъкидлаш жоизки, Бухоро бутун минтақа учун муҳим маънавий-маърифий макон ҳам эди. Бу ерда ўз вақтида қозоқ зиёлилари ва маърифатпарварларининг кўплаб таниқли намояндалари таҳсил олган, бу эса халқларимиз умумий тарихий-маданий меросининг алоҳида саҳифасини ташкил этади. Хусусан, қозоқ адабиёти, маънавияти ва ижтимоий тафаккури ривожига сезиларли ҳисса қўшган Машҳур Жусуп Кўпеев, Нуржон Наушабаев, Шортанбай Қанай ўғли, Султонмаҳмут Тўрайғиров ва бошқаларнинг номлари Бухоро мадрасалари билан боғлиқ.