Ўзбекистон ва Қозоғистон Президентлари сунъий интеллект бўйича хакатонда иштирок этди

 

Бухоро шаҳрида ўтказилаётган “National AI Hackathon” – сунъий интеллект бўйича умуммиллий хакатонга Ўзбекистон Президенти Шавкат Мирзиёев ва Қозоғистон Президенти Қосим-Жомарт Тоқаев ташриф буюрдилар.

 

Мазкур тадбир мамлакатда сунъий интеллект экотизимини ривожлантиришга қаратилган изчил сиёсат доирасида ташкил этилган бўлиб, унда рақамлаштириш ва илғор технологияларни жорий этиш борасида эришилган натижалар тақдим этилди.

 

Хусусан, “Рақамли ҳукумат” тизими, транспорт, божхона, солиқ, соғлиқни сақлаш, ижтимоий ҳимоя, энергетика, геология, қурилиш ҳамда қишлоқ хўжалиги соҳаларида амалга оширилаётган рақамли трансформация жараёнлари ҳақида батафсил маълумот берилди. Ушбу йўналишлардаги ислоҳотлар давлат бошқаруви самарадорлигини ошириш ва аҳолининг турмуш сифатини яхшилашга хизмат қилаётгани таъкидланди.

 

Шунингдек, Ўзбекистон ва Қозоғистон стартапларини қўллаб-қувватлаш экотизими тақдим этилди. Давлат раҳбарлари қатор истиқболли лойиҳалар фаолияти билан танишиб, уларнинг муаллифлари билан мулоқот қилдилар.

 

Миллий ва халқаро акселераторлар, жумладан “UZUM”, “TBC Bank”, “Aloqabank”, “HUMO” вa “UZCARD” фаолияти юзасидан ҳам маълумотлар берилди. Венчур инфратузилмасини ривожлантириш, ёшлар тадбиркорлигини қўллаб-қувватлаш ҳамда инновацион ғояларни амалиётга жорий этиш муҳимлиги алоҳида қайд этилди.

 

Хакатон доирасида иштирокчилар томонидан турли соҳалардаги долзарб муаммоларга ечим бўладиган лойиҳалар тақдим этилди. Очиқ мулоқот давомида ёшларнинг ижодий салоҳияти ва сунъий интеллект технологияларига бўлган қизиқиши юқори баҳоланди.

 

Тадбир якунида давлат раҳбарлари хакатон иштирокчилари ва стартап ҳамжамияти вакиллари билан эсдалик учун суратга тушдилар.