Мен Трамп маъмуриятидан қўрқмайман — Рим папаси
Папа Лео XIV ҳеч қандай баҳсга киришмаслигини айтиб, дунёни тинчлик ва ярашувга чақиришда давом этишини билдирди.
Рим-католик черкови раҳбари Папа Лео XIV АҚШ президенти Доналд Трампнинг Эрон уруши фонида билдирган танқидларига жавоб қайтарди. У Ватикан позицияси Инжил таълимотига асосланишини таъкидлаб, Трамп маъмуриятидан қўрқмаслигини маълум қилди.
Маълум қилинишича, папа Жазоирга парвоз чоғида журналистларга берган интервьюсида ўз чиқишлари сиёсий ҳужум эмаслигини урғулади. Унинг сўзларига кўра, тинчлик ва ярашувга чақириқлар черковнинг асосий вазифаси бўлиб, у бундан воз кечмайди.
Папа Лео XIV ўз хабарини Трампнинг баёнотлари билан тенглаштириш нотўғри эканини айтиб, бу Инжил хабарининг моҳиятини тушунмаслик эканини билдирди. У, шунингдек, баҳсга киришмаслигини, лекин тинчлик тарафдори сифатидаги позициясини қатъий давом эттиришини таъкидлади.
Папа урушларни кучайтираётган “ҳамма нарсага қодирлик хаёли”ни тилга олиб, Эрон билан боғлиқ можаро ва бошқа глобал зиддиятлар фонида дунёни тинчликни сақлашга чақирди.
“Биз сиёсатчи эмасмиз ва ташқи сиёсатга бошқача нуқтаи назардан қараймиз”, — деди у. Шу билан бирга, давлатлар ўртасида муаммоларни ҳал қилиш учун мулоқот ва кўп томонлама ҳамкорлик зарурлигини қайд этди.
Папа Лео XIV тинчликни тарғиб қилишда давом этишини, урушлардан қочиш йўлларини излаш ва инсонларни ярашувга чақиришни ўз миссияси деб ҳисоблашини билдирди.
Унинг сўзларига кўра, бугунги кунда кўплаб бегуноҳ инсонлар ҳалок бўлмоқда ва айнан шунинг учун бундан яхшироқ йўл борлигини айтадиган овозлар зарур.
Аввалроқ Трамп Рим Папасининг тинчлик ҳақидаги баёнотларини танқид қилганидан сўнг ўзини “шифо берувчи авлиё” қиёфасида тасвирланган суратини эълон қилгани ҳақида хабар берилганди.
