Қўқонга олиб кетилаётган кучли таъсир қилувчи дорилар тўхтатиб қолинди
Қонунбузарлар дориларни Фарғона ва Қўқон шаҳарларида сотиш билан шуғулланган.
Ўзбекистонга ноқонуний ўтказилган 11 650 дона “Регапен” кучли таъсир қилувчи дори воситалари тўхтатиб қолинди. Бу ҳақда ДХХ хабар берди.
Маълум қилинишича, Қўқон шаҳрида яшовчи, 1994 ва 2002 йилларда туғилган 2 нафар шахс ўзларининг таниши бўлган – Қўштепа туманида истиқомат қилувчи фуқаронинг Гентраъсида Фарғона туманига бориб, қўшни республикадан Ўзбекистонга ноқонуний ўтказилган 11 650 дона “Регапен” кучли таъсир қилувчи дори воситаларини қабул қилиб олган.
Сўнгра Қўқон шаҳрига қайтиб кетаётганларида тезкор гуруҳ томонидан Учкўприк тумани ҳудудида тўхтатилган вақтларида, улар автомашинадан дори воситаларини улоқтириб, воқеа жойидан қочмоқчи бўлган. Лекин, тўхтатиб қолинган.
Хабарга кўра, қонунбузарлар бу турдаги дориларни Фарғона ва Қўқон шаҳарларида яшовчи шахсларга сотиш билан шуғулланиб келган.
Ҳозирда уларга нисбатан жиноят иши қўзғатилиб, тергов ҳаракатлари олиб борилмоқда.
