Тошкент вилояти тоғларида йўқолган 4 ёшли бола топилди
Боланинг оила аъзолари уни тоғ тепасида уни унутиб қолдирган.
Тошкент вилоятининг Оҳангарон туманида тоғ ҳудудида йўқолиб қолган 4 ёшли бола қутқарувчилар томонидан соғ-саломат ҳолда топилди. Бу ҳақда ФВВ хабар берди.
Фавқулодда вазиятлар вазирлиги маълумотига кўра, ҳодиса 13 апрель куни содир бўлган. Олти кишидан иборат оила дам олиш мақсадида тоққа йўл олган. Сайр давомида улар тахминан соат 17:00 атрофида тоғ чўққисидаги қорларни кўриш учун юқорига кўтарилган.
Маълум қилинишича, айнан шу жараёнда катталар болани тоғда унутиб қолдириб, пастга тушиб кетган. Боланинг йўқлиги орадан қарийб 40 дақиқа ўтгач аниқланган.
Шундан сўнг боланинг яқинлари зудлик билан ФВВ навбатчилик қисмига мурожаат қилган. Қидирув ишларига Тошкент вилояти Фавқулодда вазиятлар бошқармаси қидирув-қутқарув гуруҳлари ҳамда “Қамчиқ” махсус қутқарув бошқармаси ходимлари жалб этилган.
Қидирув-қутқарув ишлари 6,5 соатдан ортиқ давом этган. Натижада, 14 апрель куни соат 00:20 да бола Олмалиқ махсус қидирув-қутқарув отряди қутқарувчилари томонидан топилган.
Қутқарувчилар маълумотига кўра, бола ота-онаси уни қолдириб кетган жойдан тахминан 3 километр узоқликда аниқланган. У топилган вақтда тиззасигача қор ичида жим турган ҳолатда бўлган.
Бола тиббий кўрикдан ўтказилиб, яқинларига топширилган. Ҳозирда унинг аҳволи яхши экани маълум қилинди.
