Тошкент вилоятининг Янгийўл шаҳрида содир бўлган жанжал фожиа билан якунланди
Марҳумнинг ўлимига кўкрак қафасига етказилган жароҳат ва юрак қисми зарарланиши сабаб бўлган.
Тошкент вилояти Янгийўл шаҳрида пичоқбозлик оқибатида бир киши ҳалок бўлди.
Маълум қилинишича, 2026 йил 11 апрель куни соат тахминан 20:20 ларда “Қовунчитепа” маҳалла фуқаролар йиғини Самарқанд кўчасида жойлашган сартарошхона кириш қисмида икки йигит ўртасида ўзаро жанжал келиб чиққан.
Жанжал вақтида гумонланувчи ўзи билан олиб юрган ўткир тиғли пичоқ билан жабрланувчининг кўкрак қисмига бир марта зарба берган. Олинган жароҳатлар натижасида жабрланувчи шифохонага олиб кетилаётган вақтда вафот этган.
Суд-тиббий экспертиза хулосасига кўра, марҳумнинг ўлимига кўкрак қафасига етказилган жароҳат ва юрак қисми зарарланиши сабаб бўлган.
Воқеа жойига шаҳар прокуратураси ва ИИБ раҳбарияти, шунингдек тергов-тезкор гуруҳ аъзолари етиб келган ва ҳолат юзасидан дастлабки тергов ҳаракатлари олиб борилган.
Аниқланишича марҳум 1999 йилда туғилган, оилали, икки нафар фарзанднинг отаси бўлган. У сартарошлик фаолияти билан шуғулланган.
Гумонланувчи эса 2006 йилда туғилган, муқаддам судланган ва вақтинча ишсиз бўлган.
Мазкур ҳолат юзасидан 2026 йил 12 апрель куни гумонланувчига нисбатан Жиноят кодексининг 97-моддаси 1-қисми билан жиноят иши қўзғатилган ва қамоққа олинган.
Ҳозирда тергов ҳаракатлари давом этмоқда
