“Халқлар дўстлиги саройи” ҳудудидаги реклама баннерлари олиб ташланди
Мазкур маданий мерос объектида реклама баннерлари ҳеч қандай рухсатсиз, ўзбошимчалик билан ўрнатилгани аниқланган.
Маданий мерос агентлиги барча давлат идоралари ҳамда тадбиркорларни маданий мерос объектларига ҳурмат билан муносабатда бўлишга чақирди ҳамда “Халқлар дўстлиги саройи” ҳудудидаги реклама баннерлари олиб ташланганини маълум қилди.
Агентлик маълумотига кўра, 2026 йил 14 апрель куни Тошкент шаҳрининг Шайхонтоҳур тумани, Фурқат кўчасида жойлашган “Халқлар дўстлиги саройи” ҳудудида мониторинг ишлари ўтказилиб, унда Маданий мерос агентлиги ва унинг Тошкент шаҳар ҳудудий бошқармаси мутахассислари иштирок этган.
Ўрганишлар Вазирлар Маҳкамасининг 2021 йил 15 октябрдаги 649-сон қарори билан тасдиқланган низом талаблари асосида олиб борилган. Натижада мазкур маданий мерос объектида реклама баннерлари ҳеч қандай рухсатсиз, ўзбошимчалик билан ўрнатилгани аниқланган.
Қайд этилишича, Ўзбекистон Республикаси “Реклама тўғрисида”ги Қонуннинг 26-моддасида ташқи реклама ва ахборот объектларига (конструкцияларига) доир асосий талаблар белгиланган. Унга кўра, моддий маданий мерос объектларида ташқи рекламани жойлаштириш тақиқланади. Ҳолат юзасидан ноқонуний баннерлар зудлик билан олиб ташланган ҳамда масъулларга нисбатан тегишли чоралар кўриш бўйича огоҳлантириш берилган.
Агентлик бундай ҳолатлар маданий меросга зарар етказиши мумкинлигини таъкидлаб, барча ташкилот ва тадбиркорларни белгиланган тартибларга қатъий риоя қилишга чақирди.
