Тошкент вилоятида синтетик гиёҳванд модда сақлаган банк ходимлари ушланди
Шунингдек, Россиядан келтирилган синтетик наркотик моддалар тарқалишининг олди олинди.
Тошкент вилоятида йирик миқдордаги синтетик гиёҳвандлик воситалари мусодара қилинди. Бу ҳақда ДХХ хабар берди.
Маълум қилинишича, Тошкент шаҳрида яшовчи, 1993 йилда туғилган, муқаддам судланган ва ҳозирда пробация назоратида бўлган шахс ҳамда унинг 1995 йилда туғилган шериги Юқоричирчиқ туманидаги дала ҳудудида яширилган жойдан 2 килограмм 381 грамм “Альфа-ПВП” синтетик гиёҳвандлик воситасини олиб чиқаётган вақтида Давлат хавфсизлик хизмати Тошкент вилояти бошқармаси ва божхона органлари ходимлари томонидан қўлга олинди.
Дастлабки маълумотларга кўра, ушбу гиёҳвандлик воситалари “Телеграм” мессенжеридаги интернет наркодўкон орқали Россия Федерациясидан олиб кирилган.
Шунингдек, яна бир ҳолатда Янгийўл шаҳрида фаолият юритувчи тижорат банкларидан бирининг 2 нафар мутахассиси аввал наркокурерлар Янгийўл туманидаги дала майдонига яшириб кетган 485 грамм “Альфа-ПВП” синтетик гиёҳвандлик воситасини қабул қилиб олиб, танишининг хонадонида сақлаётганликлари аниқланди. Кўрилган чора-тадбирлар натижасида улардан ушбу гиёҳвандлик воситаси ашёвий далил сифатида олинди.
Мазкур ҳолатлар юзасидан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланилди.
Ҳозирда тергов ҳаракатлари олиб борилмоқда.
