Чирчиқда она-болани уриб юборишига оз қолган ҳайдовчи “праваси”дан маҳрум бўлди
Шунингдек, ҳайдовчига 10 миллион 300 минг сўм миқдорида жарима жазоси тайинланди.
Тошкент вилояти, Чирчиқ шаҳрида йўл ҳаракати қоидаларини қўпол равишда бузган ҳайдовчига нисбатан суд ҳукми чиқарилди. Бу ҳақда ЙҲХБ матбуот хизмати маълум қилди.
12 апрель куни ижтимоий тармоқларда Cobalt русумли автомобиль ҳайдовчиси светофорнинг тақиқловчи ишорасига амал қилмасдан, тезликни камайтирмаган ҳолда тартибга солинган пиёдалар ўтиш жойидан ўтаётган она ва болани уриб юборишига оз қолган ҳолат акс этган видео тарқалганди.
Маълум қилинишича, ўтказилган қидирув ва суриштирув ишлари давомида ушбу қоидабузарликни 33 ёшли, таксичилик фаолияти билан шуғулланувчи ҳайдовчи содир этгани аниқланган. Ҳайдовчининг билдиришича, воқеа содир бўлган вақтда у иситмаси кўтарилган 5 ёшли фарзандини олиб кетаётган бўлган ва пиёдаларни пайқамай қолган.
Мазкур ҳолат пиёдалар ҳаётига таҳдид сифатида баҳоланиб, ҳайдовчига нисбатан Маъмурий жавобгарлик тўғрисидаги кодекснинг 128-10-моддаси (йўл безорилиги) асосида маъмурий баённома расмийлаштирилган.
14 апрель куни бўлиб ўтган суд қарорига кўра, ҳайдовчи айбли деб топилиб, унга нисбатан транспорт воситаларини бошқариш ҳуқуқидан 2 йил муддатга маҳрум этиш ҳамда базавий ҳисоблаш миқдорининг 25 баравари — 10 миллион 300 минг сўм миқдорида жарима жазоси тайинланди.
