Ўзбекистонда тадбиркорлар 1 ой ичида жариманинг ярмини тўласа, қолганидан озод қилинади
Суд томонидан жарима қарори бекор қилинса ёки ҳақиқий эмас деб топилса, ундирилган пуллар қайтарилади.
Ўзбекистонда тадбиркорлар 1 ой ичида жарима миқдорининг 50 фоизини тўласа, қолган қисмини тўлашдан озод этилади. Бу ҳақда Президентнинг тегишли қарорида белгиланди.
“Молиявий жарималарни қўллаш тартибини янада либераллаштириш ва суд назорати самарадорлигини ошириш бўйича қўшимча чоралар тўғрисида”ги Президент қарорига кўра, 2026 йил 1 октябрдан тадбиркорлар ваколатли орган томонидан қўлланган молиявий жаримани ўз танловига кўра икки хил тартибда тўлаш имкониятига эга бўлади. Биринчи шаклда, қарор топширилган кундан бошлаб тадбиркор 1 ой ичида жариманинг 50 фоизини тўлаш орқали қолган қисмидан озод этилиш мумкин. Иккинчи шакл эса жарима суммасини 6 ой давомида тенг улушларда бўлиб-бўлиб тўлашни назарда тутади.
Шунингдек, агар молиявий жарима қўллаш тўғрисидаги қарор суд томонидан бекор қилинса ёки ҳақиқий эмас деб топилса, ундирилган маблағлар 15 кун ичида тўлиқ қайтарилиши белгиланган.
Қарорга мувофиқ, белгиланган муддатда қайтарилмаган маблағлар учун ҳар бир кечиктирилган кунга Марказий банкнинг асосий ставкасига боғланган ҳолда фоиз ҳисобланади. Бу ставка ҳар бир календарь куни учун асосий ставканинг 300 дан бири миқдорида белгиланган.
