Ўрта Чирчиқдаги ҳодиса “портлаш” эмас — ФВВ
Фавқулодда вазиятлар вазирлиги 4 киши ҳалок бўлган ёнғин юзасидан расмий изоҳ берди.
Фавқулодда вазиятлар вазирлиги айрим ижтимоий тармоқларда тарқалган “Ўрта Чирчиқдаги хонадонда портлаш: 4 киши вафот этди” мазмунидаги хабарлар юзасидан расмий изоҳ берди.
Маълум қилинишича, жорий йил 16 апрель куни соат 01:44 да «112» тизими орқали Тошкент вилояти Фавқулодда вазиятлар бош бошқармасига Ўрта Чирчиқ тумани “Ўрта Овул” МФЙ ҳудудидаги хонадонлардан бирида ёнғин содир бўлаётгани ҳақида хабар келиб тушган.
Хабарга асосан қутқарувчилар зудлик билан воқеа жойига етиб бориб, ёнғинни тезкорлик билан бартараф этган. Афсуски, ёнғин оқибатида 4 нафар фуқаро вафот этган.
Вазирлик томонидан қайд этилишича, айрим ижтимоий тармоқларда ушбу ҳолат «портлаш» сифатида талқин қилинган, бироқ расмий маълумотларга кўра, хонадонда портлаш содир бўлмаган.
Дастлабки суриштирувларга кўра, ёнғин хавфсизлиги қоидаларининг бузилиши, хусусан уйда фойдаланилган электр жиҳозлари қувватига мос бўлмаган электр симлар ҳамда нотўғри танланган сақлагичлар сабаб бўлиши мумкинлиги тахмин қилинмоқда.
Ҳозирда ҳолат юзасидан терговга қадар текширув ишлари олиб борилмоқда.
