Жавоҳир Синдаров “Меҳнат шуҳрати” ордени билан мукофотланди
Ўзбекистонлик гроссмейстер Кипрда ўтган Номзодлар турнирида рекорд натижалар қайд этиб, муддатидан олдин чемпионликни қўлга киритган эди.
Ўзбекистон Президенти Шавкат Мирзиёевнинг Фармонига мувофиқ, шахмат бўйича Ўзбекистон миллий терма жамоаси аъзоси Синдаров Жавоҳир Санжарбекович “Меҳнат шуҳрати” ордени билан мукофотланди.
Мазкур юксак мукофот спортчининг Янги Ўзбекистон нуфузини халқаро майдонда юксалтиришга қўшган улкан ҳиссаси, мамлакатимизда шахмат спортини кенг оммалаштириш, айниқса, ёшлар орасида ушбу интеллектуал спорт турини тарғиб этиш йўлидаги хизматлари учун топширилди.
Шунингдек, Жавоҳир Синдаров Кипрда ўтказилган Халқаро шахмат федерацияси Номзодлар турнирида юксак интеллектуал салоҳияти ва профессионал маҳоратини намоён этиб, дунёнинг энг кучли гроссмейстерлари орасида рекорд натижалар қайд этгани ҳамда муддатидан олдин ғолибликни қўлга киритгани алоҳида эътироф этилди.
Фармонда ёш авлод қалбида миллий ғурур, Ватанга муҳаббат ва садоқат туйғуларини камол топтириш борасидаги ибратли хизматлари ҳам қайд этилган.
