Эрон Ҳормуз бўғозидан ўтаётган кемалардан тўлов ундиришни бошлади
Кемалардан ундирилган бож тўловлари ҳисобидан олинган илк даромад мамлакат Марказий банки ҳисобига ўтказилди.
Эрон парламенти спикери ўринбосари Ҳамидризо Ҳожи Бабойи Ҳормуз бўғози орқали ўтувчи кемалардан ундирилган бож тўловлари ҳисобидан олинган илк даромад мамлакат Марказий банки ҳисобига ўтказилганини маълум қилди, дея хабар бермоқда BBC.
Tasnim хабарига кўра, парламент спикери маблағлар қандай тартибда йиғилгани ёки уларни кимлар тўлагани ҳақида қўшимча маълумот бермаган. BBC эса ушбу маълумотни мустақил тасдиқлай олмаганини қайд этган.
Аввалроқ, амалдаги сулҳ эълон қилинишидан олдин Теҳрон Ҳормуз бўғози орқали ҳаракатни “дўст” давлатлар билан чеклашини билдирган ҳамда бу ҳудуддан ўтувчи кемалардан бож ундириш масаласи муҳокама қилинган. Бироқ ўша даврда тўлов миқдори ёки умуман ҳақ олинаётгани юзасидан аниқлик киритилмаган.
Хусусан, март ойи охирларида Эроннинг Ҳиндистондаги элчихонаси Эрон кемалардан бўғоздан ўтиш учун 2 миллион доллар миқдорида тўлов ундирилаётгани ҳақидаги даъволарни рад этган эди.
Шу билан бирга, яна бир эронлик депутат Алиризо Салимий манбаларга таяниб Tasnim агентлигига берган изоҳида, Ҳормуз бўғози орқали ўтган кемалардан тўловлар ундирилганини айтган.
Унинг таъкидлашича, ундирилган маблағ миқдори кема тури, юк ҳажми ва хавф даражасига қараб фарқ қилади.
“Қоидаларни биз белгилаймиз”, — деган у.
АҚШ президенти Доналд Трамп Ҳормуз бўғози орқали ўтиш учун Эронга тўлов қилган кемаларга нисбатан чоралар кўрилиши мумкинлигини билдирган эди.
