60 минг доллар пора билан ушланган Наманган шаҳри собиқ ҳокими устидан суд бошланди
Собиқ ҳоким кўп қаватли уй қуриш ҳуқуқини олиб бериш ва молиялаштириш эвазига пора олаётганида ушланганди.
Бугун жиноят ишлари бўйича Ўзбекистон туман судида 60 минг АҚШ доллари миқдорида пора олишда гумонланган Наманган шаҳрининг собиқ ҳокими Анваржон Отахўжаев ва яна беш кишига оид ишни кўриш бошланди. Бу ҳақда Фарғона вилояти судлари хабар берди.
Маълум қилинишича, жами 6 нафар судланувчининг барчаси эркак бўлиб, 3 нафар судланувчига нисбатан “қамоққа олиш”, 3 нафарига эса “муносиб хулқ-атворда бўлиш” тарзидаги эҳтиёт чоралари қўлланилган.
Дастлабки тергов органининг айблов хулосасига кўра судланувчилар Жиноят кодексининг 167, 168, 205, 206, 209, 28,209, 210, 28,211 ва 212-моддаларида назарда тутилган жиноятларни содир этганликда айбланмоқда.
-
167-модда: Ўзлаштириш ёки растрата йўли билан талон-торож қилиш;
-
168-модда: Фирибгарлик;
-
205-модда: Ҳокимият ёки мансаб ваколатини суиистеъмол қилиш;
-
206-модда: Ҳокимият ёки мансаб ваколати доирасидан четга чиқиш;
-
209-модда: Мансаб сохтакорлиги;
-
28−209-модда: Мансаб сохтакорлигида иштирокчилик;
-
210-модда: Пора олиш;
-
28−211-модда: Пора беришда иштирокчилик;
-
212-модда: Пора олиш-беришда воситачилик қилиш.
Аввал хабар берилганидек, Отахўжаев ва пойабзал ишлаб чиқарувчи МЧЖ раҳбари ўзаро тил бириктириб, қурилиш соҳасида тадбиркорлик фаолияти билан шуғулланмоқчи бўлган фуқародан шаҳар ҳудудидаги 35 сотих ер майдонида жойлашган, маънан эскирган тураржой бинолари ўрнига кўп қаватли уй барпо этиш ҳуқуқини олиб бериш ва молиялаштириш эвазига 60 минг доллар талаб қилган.
