Мадурони қўлга олиш операциясида иштирок этган АҚШ офицери ҳибсга олинди
У ушбу операция бўйича махфий маълумотлардан фойдаланган ҳолда 400 минг доллардан ортиқ даромад олганликда айбланмоқда.
АҚШда Венесуэла президенти Николас Мадурони қўлга олиш бўйича махсус операцияда қатнашган ҳарбий хизматчи ҳибсга олинди. У махфий ҳукумат маълумотларидан фойдаланган ҳолда ноқонуний даромад орттирганликда айбланмоқда.
АҚШ Адлия вазирлиги маълумотига кўра, 38 ёшли сержант Ганнон Кен Ван Дайк 2025 йил декабридан 2026 йил январигача Венесуэладаги махсус операцияни тайёрлаш жараёнида иштирок этган. Шу билан бирга, у Polymarket платформасида операция натижалари ва сиёсий воқеалар бўйича пул тикиш орқали фойда кўрган.
Расмийларга кўра, ҳарбий хизматчи тахминан 13 та тикиш амалга оширган. Улар орасида АҚШ ҳарбийларининг Венесуэлага кириши, Мадуро ҳокимиятдан четлатилиши ва қўлга олиниши билан боғлиқ вариантлар бўлган. Натижада у 400 минг доллардан ортиқ маблағ ишлаб топган.
Тергов маълумотларига кўра, Ван Дайк даромадни кейинчалик криптовалютага айлантирган ҳамда аккаунтини ўчириб изларни яширишга уринган. Прокуратура буни давлат сирларидан шахсий манфаат йўлида фойдаланиш сифатида баҳоламоқда.
Унга нисбатан махфий маълумотлардан ноқонуний фойдаланиш, фирибгарлик ва молиявий жиноятлар бўйича айблов қўйилган. Агар айби исботланса, у 20 йилгача озодликдан маҳрум этилиши мумкин.
