Солиқ қўмитаси тадбиркорларни сохта электрон хатлар ҳақида огоҳлантирди
Қўмита солиқ органларининг барча расмий хабарлари фақат солиқ тўловчининг шахсий кабинети орқали юборилишини билдирди.
Солиқ қўмитаси тадбиркорларга сохта электрон хатлар юборилаётгани ҳақида расмий огоҳлантириш билан чиқди.
Маълум қилинишича, сўнгги кунларда Тошкент шаҳар солиқ бошқармаси ҳамда Йирик солиқ тўловчилар бўйича ҳудудлараро солиқ инспекцияси номидан юборилаётган хатлар аниқланган. Ушбу хабарлар норасмий бўлиб, фирибгарлик мақсадида тарқатилмоқда.
Қайд этилишича, мазкур электрон хатлар солиқ тизимида рўйхатдан ўтмаган. Улар таркибидаги ҳаволалар орқали қурилмаларга зарарли дастурлар юкланиши ёки фойдаланувчиларнинг шахсий маълумотлари қўлга киритилиши мумкин.
Солиқ қўмитаси солиқ органларининг барча расмий хабарлари фақат солиқ тўловчининг шахсий кабинети орқали юборилишини эслатди.
Фуқароларга шубҳали хабарларда келтирилган ҳаволаларни босмаслик, илова қилинган файлларни очмаслик ва маълумотларни фақат расмий манбалар орқали текширишни тавсия қилинди.
Шунингдек, фуқаролар шахсий маълумотлари хавфсизлигини таъминлаш ва фирибгарлик ҳолатларига дуч келмаслик учун ҳушёр бўлишга чақирилди.
