Ўзбекистондаги иккита компания Европа Иттифоқининг санкциялар рўйхатига киритилди

Европа Иттифоқи консуллиги Россиянинг Украинага қарши уруши сабаб янги — 20-санкциялар пакетини тасдиқлади. Баёнотда ушбу чекловлар сўнгги икки йил ичидаги энг йирик пакет ҳисобланиши келтирилган, дея ёзмоқда DW.

 

Янги пакетга кўра, Россиянинг ҳарбий-саноат комплекси билан боғлиқ 58 та компанияга нисбатан санкциялар қўлланилди. Улар орасида Хитой, БАА, Ўзбекистон, Қозоғистон ва Беларусда жойлашган 16 та ташкилот ҳам бор.

 

Ўзбекистоннинг 2 та компанияси — Фарғона Кимё Заводи ва Raw Materials Cellulose ҳам Европа иттифоқининг 20- пакети доирасидаги санкциялар рўйхатига киритилди. Бу ҳақда иқтисодчи Отабек Бакиров хабар берди.

 

 

Маълум қилинишича, Фарғона ва Жиззахда жойлашган ҳар икки компания пахтадан целлюлоза ишлаб чиқариш билан шуғулланади.

 

“Изоҳларга кўра, мазкур корхоналар пахта целлюлозасини Россиянинг ҳарбий-саноат корхоналарига (порох ишлаб чиқариш учун) етказиб беришган”, — дея ёзган Отабек Бакиров.

 

Хабарга кўра, аввалроқ Фарғона Кимё Заводини назорат қилувчиси сифатида ўзбекистонлик тадбиркор дейилган ва уч давлат фуқаролигига эга Рустам Мўминов ЕИнинг 19- пакет санкцияларига киритилган.

 

Шунингдек, янги санкциялар рўйхатига 120 нафар жисмоний ва юридик шахс киритилган. Чекловлар Россия иқтисодиётининг урушни молиялаштираётган асосий тармоқларига қаратилган.

 

Санкциялар доирасида Россиянинг “соя флоти” рўйхати яна 46 та кема билан кенгайтирилди. Танкерлар савдосида ишончлилик текширувлари жорий этилди. ЕИ мамлакатларида Россия музқаёрарлари ҳамда суюлтирилган табиий газ (STG) ташувчи танкерларига техник хизмат кўрсатиш тақиқланади. 2027 йилдан бошлаб эса Россия билан боғлиқ компанияларга STG терминаллари хизматлари кўрсатилмайди.

 

Бундан ташқари, Туапсе ва Мурманск портлари, 20 та Россия банки ҳамда учинчи давлатлардаги тўртта молиявий муассаса билан транзаксиялар тақиқланади. Криптоактивлар соҳасида ҳам чекловлар жорий этилиб, A7A5 стейблкоини ва RUBx криптовалютаси санкциялар рўйхатига киритилди. ЕИ компанияларига рақамли рублни ишлаб чиқишни қўллаб-қувватлаш ҳам ман этилди.

 

ЕИ, шунингдек, сонли дастурий бошқарувга эга станоклар ва радиоқурилмаларни Қирғизистонга экспорт қилишни тақиқлади. Баёнотда қайд этилишича, бундай маҳсулотлар кўпинча ушбу давлат орқали Россияга етказиб берилади.