АҚШ, Хитой ва Россия энди Европага қарши турибди — Макрон

Франция президенти Эммануэл Макрон Европа давлатларини ўз манфаатларини қатъийроқ ҳимоя қилишга ва фаолроқ сиёсат юритишга чақирди. Бу ҳақда Point.md ёзмоқда.

 

Фарнсия етакчиси ҳозирги геосиёсий вазиятда АҚШ, Хитой ва Россия Европага нисбатан мураккаб позицияда турганини билдирди.

 

Қайд этилишича, Макрон бу баёнотни Афина шаҳрида Греция бош вазири Кириакос Митсотакис билан ўтказилган муҳокама чоғида билдирган. Макронга кўра, ҳозирги вазият Европа учун “уйғониш палласи”дир.

 

“АҚШ, Россия ва Хитой раҳбарлари Европага нисбатан қарши позицияда турибди. Шу боис Европа ўз сиёсатини қайта кўриб чиқиши зарур”, — деди у.

 

Макрон Европа давлатларини ўзига ишончни ошириш ва мустақил сиёсий кун тартибини шакллантиришга чақирди.

 

Унинг фикрича, АҚШ билан муносабатлардаги таранглик ҳатто Доналд Трамп президентлик муддати якунлангандан кейин ҳам сақланиб қолади. 

 

“Бу вақтинчалик эмас, балки узоқ муддатли тенденция. Айрим йўналишларда ҳамкорлик давом этиши мумкин, бироқ умумий ёндашув ўзгармайди”, — деди Макрон.

 

Франция президенти Трампнинг биринчи муддати Европада вақтинчалик ҳолат сифатида қабул қилинганини, бироқ ҳозир бу қараш ўзгарганини қайд этди. Унинг сўзларига кўра, Европа давлатлари энди бирлашиб, ўз манфаатларини фаол ҳимоя қилиши зарур.

 

Маълум қилинишича, Макрон Афинага Европа кенгашининг Кипрда ўтказилган норасмий йиғилишидан сўнг ташриф буюрган. Греция ва Франция яқин кунларда икки томонлама хавфсизлик келишувини янгилашни режалаштирмоқда.