Ливан билан тинчлик жараёни бошланган — Нетаняху
Исроил бош вазири Доналд Трамп Эронга ҳар томонлама кучли босим ўтказаётганини билдирди.
Исроил бош вазири Бинямин Нетаняху Исроил Доналд Трамп маъмурияти билан Эрон устидан иқтисодий ва ҳарбий босимни кучайтираётганини маълум қилди. Бу ҳақда Iran International хабар берди.
У жума куни эълон қилинган видео мурожаатида Исроил “Яқин Шарқдаги вазиятни ўзгартиришга интилаётганини” ва ҳозирги сиёсий ҳамда ҳарбий чоралар шу стратегия доирасида амалга оширилаётганини билдирди.
Нетаняху Эрон масаласида АҚШ билан ҳамкорлик давом этаётганини таъкидлаб, Трамп билан ўтган суҳбат “жуда яхши” бўлганини қайд этди. Унинг сўзларига кўра, АҚШ Эронга нисбатан иқтисодий ва ҳарбий босимни кучайтирмоқда ва Исроил ҳам бу жараёнда тўлиқ ҳамкорликда ҳаракат қилмоқда.
Шунингдек, у Исроилнинг шимолий йўналишдаги вазиятига тўхталиб, Ливан билан дипломатик муносабатлар бошланганини билдирди.
Унинг айтишича, томонлар ўртасида “тарихий тинчлик”ка эришиш жараёни бошланган, бироқ бу жараённи издан чиқаришга уринишлар мавжуд.
“Ливан бўйича биз Исроил ва Ливан ўртасида тарихий тинчликка эришиш жараёнини бошладик, аммо 'Ҳизбуллоҳ' уни бузишга уринмоқда,” — деди Нетаняху.
Маълумот ўрнида, 23 апрель куни кечқурун АҚШ президенти Доналд Трамп Исроил ва Ливан ўртасидаги сулҳ яна уч ҳафтага узайтирилганини ва Вашингтон икки давлат ўртасида узоқ муддатли тинчлик келишувига эришишга интилаётганини эълон қилди.
