Наманганда Lacetti сойга тушиб кетди
Ҳодиса жойида қутқарувчилар ва кўнгиллилар икки нафар фуқарони машинадан олиб чиққан.
Бугун, 25 апрель куни Наманган вилояти Тўрақўрғон туманида йўл-транспорт ҳодисаси содир бўлди. Бу ҳақда Фавқулодда вазиятлар вазирлиги маълум қилди.
Қайд этилишича, туманнинг «Оқтош» маҳалласида ҳаракатланаётган Lacetti русумли автомобиль ҳайдовчиси бошқарувни йўқотиши оқибатида транспорт воситаси сойга тушиб кетган.
Ҳодиса юзасидан «112» ягона диспетчерлик тизими орқали Наманган вилояти Фавқулодда вазиятлар бошқармасига хабар келиб тушган. Шундан сўнг қутқарувчилар зудлик билан воқеа жойига етиб борган.
Қутқарувчилар атрофдаги кўнгилли фуқаролар билан биргаликда автомобиль ичида бўлган икки нафар фуқарони қутқариб, хавфсиз ҳудудга олиб чиққан. Шундан сўнг жабрланганлар тез тиббий ёрдам ходимларига топширилган.
