Нетаняху саратондан тузалганини маълум қилди
У 2023 йилда юрак стимулятори ўрнатган, 2024 йилда чурра билан боғлиқ операция ўтказган, ўтган йили ингичка ичак шиллиқ қаватининг яллиғланиши билан даволанган.
Исроил бош вазири Бинямин Нетаняxу эрта босқичда аниқланган саратон касаллигидан тузалганини билдирди. Бу ҳақда Point.md хабар берди.
Унинг сўзларига кўра, 2024 йил охирида унда простата аденомаси аниқланиб, шу сабаб операция ўтказилган. Бироқ Нетаняхунинг таъкидлашича, кейинги текширувлар давомида унда эрта босқичдаги ёмон сифатли ўсма ҳам аниқланган.
“Мен муаммони изсиз бартараф этган мақсадли даволаниш курсини танладим”, — деб ёзди 76 ёшли сиёсатчи ижтимоий тармоқларда.
У даволаниш қачон ва қандай ўтказилгани ҳақида аниқ маълумот бермаган, бироқ ҳозир ўзини соғлом ҳис қилаётганини қайд этган.
Der Spiegel Нетаняху аввал ҳам бир неча бор соғлиғи билан боғлиқ муаммолар сабаб шифохонага ётқизилганини ёзмоқда. Хусусан, 2023 йил ёзида унга юрак стимулятори ўрнатилган, 2024 йилда эса чурра билан боғлиқ операцияни бошидан кечирган ва ўтган йили энтерит — ингичка ичак шиллиқ қаватининг яллиғланиши билан даволанган.
