Самарқандда 2 гектар ерни 490 минг долларга сотмоқчи бўлган шахслар ушланди
Улар иссиқхона учун ажратилган ер майдонини танишлари орқали харидорга расмийлаштириб бермоқчи бўлган.
Самарқандда ер сотиш билан боғлиқ ноқонуний ҳолат аниқланди. Бу ҳақда ДХХ хабар берди.
Маълум қилинишича, Самарқанд шаҳрида яшовчи, 1993 йилда туғилган шахс Самарқанд туманида истиқомат қилувчи, 1983 йилда туғилган фуқаро билан тил бириктириб, унинг турмуш ўртоғига иссиқхона ташкил қилиш учун ажратиб берилган 2 гектар ер майдонини харидорга 490 минг АҚШ долларига сотишини ва мансабдор танишлари орқали ҳужжатларини расмийлаштириб беришини айтиб, олдиндан 50 минг АҚШ доллари талаб қилади.
ДХХ, ИЖҚКД ва ИИБ ходимлари ҳамкорлигида ўтказилган тезкор тадбирда 1993 й.т. шахс 50 минг долларни олган вақтида ашёвий далиллар билан ушланди.
Ҳозирда мазкур икки фуқарога нисбатан жиноят иши қўзғатилиб, тергов ҳаракатлари олиб борилмоқда.
Мaълумот ўрнида, ер участкаларини ажратиш ва сотиш фақатгина “E-AUKSION” электрон савдо платформаси орқали шаффоф ва қонуний тарзда амалга оширилади.
