Туркияда 15 ёшгача бўлган болаларнинг ижтимоий тармоқларга кириши чекланади

 

Туркияда 15 ёшгача бўлган болаларнинг ижтимоий тармоқлардан фойдаланишини чеклашга қаратилган янги қонун қабул қилинди. Мазкур ҳужжатга кўра, рақамли платформалар вояга етмаган фойдаланувчиларнинг ёшини текшириш бўйича махсус тизимларни жорий этиши шарт бўлади.

 

Янги тартиб ижтимоий тармоқлар билан бир қаторда ўйин платформаларига ҳам татбиқ этилади. Эндиликда бундай хизматлар ўйинларни ёш тоифалари асосида таснифлаб, тегишли назорат механизмларини йўлга қўйиши лозим.

 

Шунингдек, фойдаланувчилари сони юқори бўлган халқаро платформаларга Туркия ҳудудида расмий вакил тайинлаш талаби ҳам белгиланди. Бу эса давлат органлари билан ҳамкорликни кучайтириш ва қонунчилик талабларига риоя этилишини таъминлашга қаратилган.

 

Маҳаллий ОАВ хабарларига кўра, расмийлар болалар хавфсизлигини ошириш мақсадида номақбул контентни автоматик блоклайдиган махсус болалар СИМ-карталарини жорий этиш масаласини ҳам кўриб чиқмоқда. Бундан ташқари, ВПН хизматларини чеклаш ҳамда 18 ёшгача бўлганлар учун интернетдан фойдаланиш бўйича қўшимча тартибларни жорий этиш эҳтимоли ҳам муҳокама қилинмоқда.

 

Эслатиб ўтамиз, 15 апрель куни Туркиянинг жануби-шарқидаги Қаҳраманмараш вилоятидаги мактабда юз берган отишмада тўққиз киши ҳалок бўлган ва 21 киши жароҳатланган эди. 14 апрель куни Шанлиурфа вилоятидаги мактабда ўн тўққиз киши жароҳат олгани хабар қилинган эди.