Японияда давлат хизматчиларига “шортик” кийишга рухсат берилди
Ушбу чора орқали расмийлар кондиционерларга бўлган боғлиқликни камайтириб, энергия харажатларини қисқартиришни кўзламоқда.
Япониянинг Токио шаҳри ҳокимияти давлат хизматчиларига ёзги иссиқда энергия харажатларини камайтириш мақсадида костюм ўрнига шортик кийишни тавсия қилмоқда. Бу ҳақда The Guardian нашри хабар берди.
Маълум қилинишича, расмийлар бу чора АҚШ–Исроилнинг Эрон билан уруши фонида энергия харажатларининг ошиши ортидан қабул қилинганини билдирмоқда.
Япониянинг ‘Cool Biz’ энергия тежаш ташаббусидан илҳомланган Токио расмийлари ушбу чора кондиционерларга бўлган боғлиқликни камайтиришига умид қилмоқда. 2005 йилда Япония атроф-муҳит вазирлиги томонидан йўлга қўйилган ушбу дастур дастлаб давлат хизматчиларига галстук ва пиджакдан воз кечишни тавсия этган, бироқ ҳозиргача шортик кийишга рухсат бермаган эди.
Энергия танқислиги хавфи Токиода давлат хизматчиларига иш жойида эркинроқ кийинишга рухсат берилишига сабаб бўлган омиллардан бири сифатида кўрилмоқда. Agence France-Прессе хабарига кўра, ташаббус жорий этилганидан буён айрим ходимлар шортик, футболка ва қисқа енгли кийимларда ишга келишни бошлаган.
Маҳаллий ОАВга интервью берган бир давлат хизматчиси шортикда ишга келган илк кунини изоҳлаб, “Аввалига бироз ҳаяжонландим, аммо жуда қулай экан, иш самарадорлигим ҳам ошади деб ўйлайман”, — деган.
Токио губернатори Юрико Коике эса электр энергияси таъминоти билан боғлиқ вазият мураккаб бўлиши мумкинлигини таъкидлаб, қулай кийимларни — поло кўйлаклар, футболкалар, кроссовкалар ва айрим ҳолларда шортикларни кийишни тавсия қилган.
Мутахассислар фикрича, Эрон уруши омилидан ташқари, иқлим ўзгариши ҳам иш кийимларига бўлган ёндашувни ўзгартиришга мажбур қилмоқда. Япония метеорология агентлиги маълумотига кўра, мамлакат 1898 йилдан бери кузатилган энг иссиқ ёзни ўтган йили бошдан кечирган. Ҳозирда эса ҳароратнинг 40°C ва ундан юқорига чиқиши одатий ҳолга айланиб бормоқда.
Агентлик яқинда “кокушо” — яъни “ўта жазирама иссиқ” деб аталувчи янги экстремал об-ҳаво ҳодисасини ҳам жорий этди.
Яқин Шарқдаги можаронинг Осиёга таъсири
Япония ва Осиёнинг бошқа давлатлари Яқин Шарқдаги можаро туфайли нефть нархларининг ошиши ва ёнилғи таъминотидаги узилишлардан хавотирда. Япония импорт қиладиган нефтнинг қарийб 90 фоизи Яқин Шарқдан келади ва унинг катта қисми Ҳормуз бўғози орқали ташилади. Жанубий Кореяда ишлатиладиган табиий газнинг қарийб 20 фоизи ҳам айнан шу йўналиш орқали етказиб берилади.
Вьетнам, Жанубий Корея ва бошқа давлатлар энергия истеъмолини чеклаш чораларини кўрмоқда.
Айрим Осиё мамлакатларида эса давлат хизматчиларига масофадан ишлаш тавсия қилинмоқда ёки иш ҳафтаси қисқартирилмоқда. Сеулда аҳолига қисқа масофаларда пиёда ёки велосипедда ҳаракатланиш тавсия этилган.
Япония аллақачон стратегик нефть захираларидан фойдаланишни бошлаган. Маҳаллий ОАВ хабарига кўра, 1 майдан бошлаб яна қўшимча 20 кунлик нефть захирасини бозорга чиқариш режалаштирилмоқда. Шунингдек, мамлакат Ҳормуз бўғозидан ташқари йўллар орқали етказиб берувчилардан ҳам нефть харид қилмоқда.
Мутахассислар огоҳлантиришича, агар муҳим денгиз йўлаги орқали юк ташиш тез орада тикланмаса, дунёнинг тўртинчи йирик иқтисодиёти бўлган Японияда хом нефть танқислиги юзага келиши мумкин. Бу эса 1970 йиллардаги нефть инқирозлари давридаги каби бензин ва электр энергиясидан фойдаланишни кескин чеклаш чораларига олиб келиши эҳтимолдан холи эмас.
