Ўзбекистонда ҳайвонлар касалликлари бўйича янги карантин қоидалари тасдиқланди
Эндиликда чорвачиликда касаллик тарқалишига қараб карантин ҳудудлари белгиланади.
Ўзбекистонда ҳайвонларнинг юқумли касалликлари тарқалишининг олдини олиш мақсадида янги карантин қоидалари тасдиқланди. Вазирлар Маҳкамасининг тегишли қарори билан инфекцион касалликлар юзага келган ҳолатларда чеклов чораларини жорий этиш тартиби расман белгиланди.
Янги тартибга кўра, карантин ҳудудлари касалликнинг оғирлик даражаси, тарқалиш хавфи ҳамда қўзғатувчи омилларнинг биологик хусусиятларидан келиб чиқиб белгиланади. Касаллик аниқланган жойларда ветеринария-санитария тадбирлари амалга оширилади.
Шунингдек, профилактик тадбирларга алоҳида эътибор қаратилиб, давлат чегараси орқали олиб кирилаётган ҳайвонлар учун махсус карантин масканлари ташкил этилади.
Мазкур қоидалар ташкилий-ҳуқуқий шаклидан қатъи назар, Ўзбекистон Республикаси ҳудудида барча турдаги ҳайвонларни боқиш ва ҳайвонлардан олинган маҳсулотларни қайта ишлаш билан шуғулланадиган жисмоний ва юридик шахсларга нисбатан қўлланилади.
Карантин талабларига риоя этилиши Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси ҳамда унинг ҳудудий бўлинмалари томонидан назорат қилинади.
Бундан ташқари, карантин чораларини талаб қилувчи хавфли юқумли касалликлар рўйхати ҳам тасдиқланди.
