Афғонистонда уй томи қулаши оқибатида беш киши ҳалок бўлди
Дастлабки маълумотларга кўра, ҳодисага кучли ёғингарчилик сабаб бўлган бўлиши мумкин.
Афғонистоннинг ғарбий қисмидаги Бадғис вилоятида юз берган фожиали ҳодиса оқибатида бир оиланинг беш нафар аъзоси ҳалок бўлди. Қурбонлар орасида тўрт нафар бола ва бир аёл бор. Бу ҳақда Синьхуа ахборот агентлиги хабар берди.
Маҳаллий манбаларга кўра, ҳодиса вилоят маркази Қала-и-Нау шаҳрида содир бўлган. Уй томининг қулаб тушиши натижасида яна икки киши турли даражадаги тан жароҳатлари олиб, шифохонага ётқизилган.
Расмийлар ҳодиса сабаблари юзасидан суриштирув ишларини олиб бормоқда. Дастлабки маълумотларга кўра, ҳудудда кузатилган кучли ёғингарчилик ва намлик оқибатида уй конструкцияси заифлашган бўлиши мумкин.
Қайд этилишича, Афғонистоннинг кўплаб ҳудудларида аҳоли лой ва хом ғиштдан қурилган уй-жойларда истиқомат қилади. Бундай иншоотлар кучли ёмғир, сув тошқини ва бошқа табиий офатлар вақтида юқори хавф остида қолади.
Аввалроқ мамлакатнинг бошқа ҳудудида ҳам шунга ўхшаш ҳодиса кузатилиб, инсонлар ҳалок бўлгани хабар қилинган эди.
