Наманганда каналда оқиб кетаётган 3 ёшли бола қутқарилди
ФВБ ходими боланинг оқиб кетаётганини пайқагач, сувга сакраб уни олиб чиққан. Болага ўз вақтида ёрдам кўрсатилган ва унинг аҳволи яхши.
Наманган вилояти Янги Наманган туманида 26 апрель куни ФВВ ходими каналда оқиб кетаётган 3 ёшли болани қутқариб қолди. Бу ҳақда вилоят ФВБ хабар берди.
Маълум қилинишича, ҳодиса тумандаги “Мингтерак” маҳалла фуқаролар йиғини ҳудудидан оқиб ўтувчи Катта Наманган каналида содир бўлган.
Давлатобод тумани фавқулодда вазиятлар бўлими ходими Улуғбек Асқаров хизматдан уйга қайтаётган вақтда каналда 3 ёшли боланинг оқиб кетаётганини пайқаб қолган.
Шундан сўнг қутқарувчи зудлик билан сувга сакраб, чўкаётган болани олиб чиққан ва унинг ҳаётини сақлаб қолган. Маълум қилинишича, болага ўз вақтида ёрдам кўрсатилган ва ҳозирда унинг аҳволи яхши.
Қутқарув жараёни маҳаллий аҳоли хонадонларидан бирига ўрнатилган кузатув камерасига ҳам тушиб қолган.
