Навбаҳор Ҳамидова World Boxing кубогида икки карра чемпион бўлди
У Остона шаҳрида бўлиб ўтган 2025-йилги турнирда ҳам олтин медални қўлга киритган.
Бразилиянинг Фоз до Игуасу шаҳрида ўтказилаётган World Boxing кубогида ўзбекистонлик боксчи Навбаҳор Ҳамидова яна бир бор юқори натижа қайд этди. Бу ҳақда Ўзбекистон бокс федерацияси хабар берди.
Маълум қилинишича, -65 кг вазн тоифасида ярим финал босқичида рингга кўтарилган Ҳамидова англиялик Саха Ҳикейни 3:2 ҳисобида мағлуб этиб, финал йўлланмасини қўлга киритди.
Ҳал қилувчи баҳсда эса у қозоғистонлик Аида Абикеевага қарши ишончли жанг ўтказиб, 5:0 ҳисобида мутлақ устунлик билан ғалаба қозонди ва турнир чемпионига айланди.
Қайд этилишича, Навбаҳор Ҳамидова аввал ҳам — 2025 йилда Остона шаҳрида бўлиб ўтган World Boxing кубогида олтин медални қўлга киритган. Ўша финалда у туркиялик машҳур боксчи, Олимпиада чемпиони Бусеназ Сурменелини мағлуб этган.
Шу тариқа, Ҳамидова мазкур мусобақа тарихида икки карра чемпион сифатида ўз номини мустаҳкамлади.
