Россиядан ота-она қарамоғисиз қолган уч бола Ўзбекистонга қайтарилди
Жорий йилда Россиядан қайтарилган болалар сони 43 нафарга етди.
Жорий йилнинг 28 апрель куни ота-оналари Россиядан депортация қилингани сабабли қаровсиз қолган уч нафар вояга етмаган бола Ўзбекистонга қайтарилди. Бу ҳақда Ижтимоий ҳимоя миллий агентлиги матбуот хизмати маълум қилди.
Болалар Тошкент шаҳридаги Ислом Каримов номидаги халқаро аэропортга олиб келинган. У ерда уларга дастлабки тиббий ва ижтимоий ёрдам кўрсатилиб, ҳолати баҳоланди ҳамда тегишли ҳужжат ва тартиб-таомиллар амалга оширилган.
Шу куннинг ўзида болалар ўз ота-оналарига топширилган. Ҳозирда уларнинг яшаш ҳудудида «Инсон» ижтимоий хизматлар марказлари томонидан кейинги ижтимоий қўллаб-қувватлаш ишлари олиб борилмоқда.
Таъкидланишича, жорий йил бошидан буён Россия Федерацияси ҳудудидан Ўзбекистонга қайтарилиб, оилалари билан бирлаштирилган вояга етмаганлар сони 43 нафарга етди.
