Ўзбекистонда корхоналардан чиқувчи зарарли моддалар ташланмаси камайтирилди

“Иссиқлик электр станциялари” АЖ 2026 йил биринчи чорагида Sustainable Fitch агентлигининг илк ESG рейтингига эга бўлди.

 

Маълум қилинишича, “Иссиқлик электр станциялари” АЖ таркибига кирувчи электр станциялар атроф-муҳитга таъсир даражасига кўра I, II ва III тоифаларга мансуб бўлиб, барча корхоналарда экологик бошқарув ISO 14001 халқаро стандарти ҳамда ESG (экологик, ижтимоий ва корпоратив бошқарув) тамойиллари асосида йўлга қўйилган. 

 

Экология ва атроф-муҳитни муҳофаза этиш йўналишида амалга оширилган ишлар натижасида “Иссиқлик электр станциялари” АЖ 2026 йил биринчи чорагида Sustainable Fitch агентлигининг илк ESG рейтингига эга бўлди. Компания 50 балл кўрсаткични қайд этиб, барқарор ривожланиш соҳасида шаклланган институционал асосларни намоён этган.

 

Жорий йилнинг 1-чораги якунлари бўйича тизим корхоналарида олиб борилган чора-тадбирлар натижасида ўтган йилнинг мос даврига нисбатан 1,4 минг тонна ифлослантирувчи моддалар ва 300 минг тонна CО₂ моддаси ташланмалари камайтирилди.

 

Атмосферага салбий таъсирни камайтириш мақсадида амалий чоралар кўрилди. Жумладан:

 

• “Яшил макон” дастури доирасида баҳор мавсумида 19 минг туп дарахт ва бута кўчатлари экилиб, режалар 190 фоизга бажарилди;
• чанг-газ тозалаш қурилмаларида профилактика ишлари олиб борилди;
• 25 та ёқилғини механик тозаловчи филтрлар янгиланди;
• 13,5 МВт қувватли қуёш фотоэлектр станциялари ишга туширилди;
• анъанавий автомашина парки модернизация қилиниб, 25 та электромобиль эксплуатацияга киритилди;
• Сирдарё ИЭСда авариявий ва фавқулодда ҳолатларда мазут ёқиш жараёнларини оптималлаштириш мақсадида замонавий эмульсия тайёрлаш қурилмаси ўрнатилди.

 

Шунингдек, рақамли экологик назоратни кучайтириш бўйича ишлар амалга оширилмоқда. Бугунги кунда 19 та устувор манба автоматик мониторинг станциялари билан жиҳозланган бўлиб, уларнинг 11 таси ягона ахборот тизимига интеграция қилинган, қолганлари бўйича ишлар давом этмоқда.

 

Санитар-ҳимоя зоналарида эса жами 13 та экопост ўрнатилган бўлиб, уларни босқичма-босқич интеграция қилиш ишлари амалга оширилмоқда.

 

Ҳозирги кунда 7 та сув тозалаш иншооти орқали йилига 26 миллион кубметр сув тозаланиб, унинг 18 миллион кубметри қайта ишлаб чиқариш жараёнларига йўналтирилмоқда.

 

Шу билан бирга, суғориш тизимлари 45 километрга етказилиб, яшил ҳудудларни сақлаш ва ривожлантиришга хизмат қилмоқда.

 

Бундан ташқари, 2,2 гектар ер майдонида рекультивация ишлари амалга оширилиб, бузилган ерлар тикланди.