Бағдод туманига янги ҳоким тайинланди
У аввал Фарғона вилояти ҳокимининг қурилиш масалалари бўйича ўринбосари сифатида ҳам ишлаган.
Бағдод туманига Исақов Ҳожиқўзижон Қосимжонович ҳоким этиб тайинланди. Бу ҳақда Фарғона вилояти ҳокимлиги хабар берди.
Маълум қилинишича, Халқ депутатлари Бағдод туман Кенгашининг навбатдан ташқари сессиясида лавозимидан озод этилган Ғанижон Солиев ўрнига янги туман ҳокимини тайинлаш билан боғлиқ ташкилий масала кўрилди. Сессия ишида вилоят ҳокими Хайрулло Бозоров иштирок этди.
Вилоят ҳокими Хайрулло Бозоров томонидан тақдим этилган Исақов Ҳожиқўзижон Қосимжонович номзоди туман депутатлари томонидан қўллаб-қувватланиб, Бағдод тумани ҳокими этиб тасдиқланди.
У ҳозирга қадар Фарғона вилояти 426-хўжаликлараро ихтисослашган кўчма механизмлар колоннаси масъулияти чекланган жамияти бошлиғи бўлиб ишлаб келган.
Ҳожиқўзижон Исақов аввал Фарғона вилояти ҳокимининг қурилиш масалалари бўйича ўринбосари сифатида ҳам ишлаган.
