Чехия Бош вазири Андрей Бабиш расмий ташриф билан Ўзбекистонга келади
Тошкентда олий даражадаги музокаралар ўтказилиши режалаштирилган.
Чехия Бош вазири Андрей Бабиш 29-30 апрель кунлари расмий ташриф билан Ўзбекистонга келади, деб хабар берди Ўзбекистон Президенти матбуот хизмати.
Ташриф дастурига мувофиқ, Тошкентда олий даражадаги музокаралар бўлиб ўтади, улар давомида Ўзбекистон-Чехия кўп қиррали ҳамкорлигини янада ривожлантириш истиқболлари муҳокама қилинади.
Асосий эътибор ўзаро савдони ошириш ва машинасозлик, яшил энергия, кимё, фармацевтика ва транспорт соҳаларидаги ҳамкорликни чуқурлаштиришга қаратилади. Маданий, гуманитар ва таълим соҳаларидаги ҳамкорлик масалалари ҳам муҳокама қилинади.
Халқаро масалалар, жумладан, кўп томонлама майдонларда ўзаро қўллаб-қувватлаш бўйича фикр алмашинув ҳам бўлиб ўтади.
Учрашув якунидa икки томонлама ҳужжатлар тўплами имзоланиши кутилмоқда.
Бош вазир Андрей Бабиш ташрифи доирасида Ўзбекистон-Чехия бизнес форумида ҳам иштирок этади.
