Тошкентда профилактика инспекторлари ногиронлиги бўлган аёлни калтаклагани рад этилди
Тошкент шаҳар ИИБ ижтимоий тармоқларда тарқалган хабарларга ойдинлик киритди.
Ижтимоий тармоқларда профилактика инспекторлари ногиронлиги бўлган аёлни калтаклагани ҳақида хабарлар тарқалганди. Мазкур ҳолат юзасидан Тошкент шаҳар ИИБ расмий маълумот берди.
Маълум бўлишича, 1995 йилда туғилган Ш.Қ. (ногиронлиги мавжуд эмас) 2025 йилнинг январь ойидан август ойига қадар таниши 1996 йилда туғилган Х.М. билан расмий никоҳсиз Мирзо Улуғбек туманида жойлашган уйда (Х.М.га тегишли хонадон) бирга яшаб келган.
2025 йилнинг декабрь ойида фуқаро Х.М. ушбу хонадонни 1999 йилда туғилган З.С. га ижарага берган. 10 декабрь куни ушбу хонадонга Ш.Қ. ўзининг онаси Г.Қ. ва синглиси З.Қ. билан бирга келиб, ижарада яшаётган фуқаролар билан ўзаро жанжаллашган. Воқеа жойига ҳудудий профилактика инспекторлари А.Холиёров ва У.Хамидуллаевлар келиб, ушбу жанжални тўхтатишга ҳаракат қилган. Шу жараёнда Ш.Қ. хонадонга кириш эшиги олдига ётиб олиб, хонадондан кетмаслигини маълум қилиб жанжал қилган. Ушбу жанжалга З.С.нинг отаси С.С. ҳам аралашган ва Г.Қ. енгил даражадаги жароҳат олган.
Хабарга кўра, мазкур ҳолат юзасидан фуқаролар Ш.Қ., Г.Қ., З.Қ. ларга нисбатан Ўзбекистон Республикаси Маъмурий жавобгарлик тўғрисидаги кодексининг 183-моддаси, 194-моддаси билан, З.С.га 183-модда билан, С.С.га 52-модда асосида маъмурий баённома расмийлаштирилиб, тўпланган ҳужжатлар жиноят ишлари бўйича Мирзо Улуғбек тумани судига тақдим этилган.
Бироқ, Ш.Қ., Г.Қ., З.Қ. лар бир неча маротаба судга чақирилган бўлса-да судга келмаганлиги аниқланган.
